सलाम छ डाक्टरलाई
हतारो, लतारो,
लछारो, पछारो हुँदै आफू
ज्यान बचाउनलाई हाम्रो
घाँटीमा आला बोकी
हस्याङ्ग–फस्याङ्ग कुद्दै गरेका
डाक्टलार्ई सलाम छ ।
पछि पर्या छैनन् उनी
तिम्रा बिरामी उचाल्न, बोक्न,
राख्न र सान्त्वना दिन बिरामीलाई
परिवार अनि आफन्तलाई
बचाउन जीवन कसैको हतार–हतार
अक्सिजन जोड्दै गरेका
डाक्टरलाई सलाम छ ।
सिकिस्त भए रे बिरामी
भन्ने सुनी दगुरादगुर गर्दै छन् उनी
परवाह छैन, उनलाई आफ्नो
न हातमा पन्जा छ
न मास्क र पिपिई छ
तै पनि ज्यानको माया मारेर अरुको
ज्यान बचाउन तल्लीन
डाक्टरलाई सलाम छ ।
परिवार छन् उनका पनि
रोएका छैनन् सम्झेर उनी
सम्हालिंदै आफू, सम्हाल्दै र सम्झाउदै छन्
बिरामिलाई अनि आफन्तलाई
कस्तो सहनशीलता उनमा
कस्तो मानवता उनको
बिर्सेर घर परिवार नातागोता
सेवामा खटिईरहने
डाक्टरलाई सलाम छ ।
गुमाउँदै छन् जीवन दिनहुँ
सयौं हजारौंले तर पनि
निडर देखिन्छन उनी
साहस छ उनमा
आत्मविश्वास छ उस्तै गरी
निस्फिक्री ज्यान बचाउँदै गरेका
डाक्टरलाई सलाम छ ।
सोधेका छौं उनलाई
भोक लाग्या छ भनेर ?
न भोक न प्यास छ,
न निद्राको परवाह छ
यसरी जीवन बचाउन सबैको
अस्पतालमा खटिरहेका
डाक्टरलाई सलाम छ ।
चौबिसै घण्टा पिपिईमा गुम्सिएर
निसासिएर, पिल्सिएर
जोड्दै छन् अक्सिजन
दिंदै छन् ओखती–मुलो
घण्टा – घण्टामा प्रेसर,
ज्वरो नाप्दै गरेका
नर्सहरूलाई सलाम छ ।
भेट्न पाएका छैनन्
परिवार, आफन्त, इष्टमित्र
गुम्सिएका छन् एउटै कोठाभित्र
हेर त पिपिईभित्र पसिना–धारा
यस्तो पीडा लुकाई कर्ममा जुटिरहेका
डाक्टरलाई सलाम छ ।
सहेर बसेका छन् उनी
ढुङ्गाले हान्दा, लछार्दा, पछार्दा पनि
मतलव छैन उनलाई आफू मरे पनि
न त छ आफन्तको चिन्ता
हरबखत बिरामी रोगीकै छ टन्टा
तर पनि बचाइरहेछन् तिम्रा बिरामी
यस्तो महान् कार्य गर्ने
डाक्टरलाई सलाम छ ।
सहँदै छन् गाली
सहदै छन् पिटाइ पनि
तिमी भए कति रिसाउँथ्यौ
पिट्थ्यौ अरूलाई पनि उसैगरी
हेर त खै रिसाए उनी
हाँसिरहेका छन् तर पनि
परोपकारमा तल्लीन
यस्ता सहनशील
डाक्टरलाई सलाम छ ।
भन्दैथे धेरै दिन भो खाना नखाएको
बुढी भाकी आमाको मुख हेर्न नपाएको
तैपनि रत्तिभर नलिई गुनासो मनमा
हेर त कसरी चित्त बुझाएको
न रोएका छन्
न आत्तिएका नै छन्
धमाधम काममा घोटिएका छन्
यसरी अविचलित रूपमा
सेवामा खटिने
डाक्टरलाई सलाम छ ।
तलब, भत्ता समयमा पाउँदैनन्
जोखिम भत्ता भन्दै सरकार,
मन्त्री र सचिवले गोजी तातो बनाउँछन् ।
फिल्डमा कोरोनासँग
लाप्पा खेल्ने यिनले
एकथोपा पाउँदैनन्
तर पनि रत्तिभर आशा नराखी
खुरुखुरु मरेका लास उठाउने
स्वास्थ्यकर्मीलाई सलाम छ ।
सलाम छ ती पिपिईमा
गुम्सिएका नर्सहरूलाई
सलाम छ ती निस्वार्थी डाक्टरहरूलाई
सलाम छ दिनरात आफूलाई भुलेर
अरूको भलाइका लागि
कर्मशील नर्सहरूलाई ।
सलाम छ डाक्टरहरूलाई ।
प्रतिकृया दिनुहोस्