April 20, 2024, Saturday
२०८१ बैशाख ८, शनिबार

प्रिय बादल

 प्रिय बादल !
 तिमी फेरि बर्सिदेऊ
 बेस्सरी
 यो धर्तीमा
 अब बाँझो हुन दिनुहुन्न
 यो धर्तीलाई
 बुद्ध र सीताहरू
 जन्मिएको यो धर्ती
 बलभद्र र भृकुटीले
 नासो छाडेको
 यो धर्ती
 फेरि सिञ्चित हुनुपर्छ।
 
 प्रिय बादल !
 तिमी फेरि बर्सिदेऊ
 बेस्सरी
 यो धर्तीमा
 बुद्ध र बलभद्रले
 फेरि यो घर्तीलाई
 अँगालो हाल्न पाउनुपर्छ
 यही धर्तीमा शिरानी हालेर
 फेरि शान्ति र क्रान्तिको
 गीत गाउनुछ
 भृकुटी र सीताले
 यही धर्तीमा
 सिउँदोको साइनो गाँस्न पाउनुपर्छ
 
 धेरै भयो यहाँ पृथ्वीनारायणहरू
 जन्मिएका छैनन्
 अमर सिंह, भक्ति र भीमसेनहरू
 देखिएका छैनन्
 उजाड छ यो वर्तमान
 
 त्यसैले
 प्रिय बादल !
 तिमी फेरि बर्सिनुछ
 यस धर्तीमा
 नेपाल आमाको एक सच्चा सपूत
 जन्माउन छ
 त्यसैले त,
 आऊ प्रिय बादल
 समागम गर यस धर्तीसँग
 र
 छरि देऊ तिम्रो बीज वीर्य
 जन्मिन्नु छ यहाँ
 नयाँ नेपालको साँचो युग नायक
 जसले बाँड्ने छैन
 कागजका खोस्टामा
 सपनाका बिस्कुनहरू
 
 प्रिय बादल !
 तिमी फेरि बर्सिदेऊ
 बेस्सरी यो धर्तीमा
 अब बाँझो हुनदिनु हुन्न
 यो धर्तीलाई
 यो सभ्यताको
 उषाभूमिलाई ।