निःस्वार्थ माया

 जूनले धर्तीलाई गरेझैँ निस्वार्थ उसको माया
 जब रात हुन्छ
 ऊ सहन सक्दैन तिमी अन्धकारमा रुमलिएर आत्तिएको
 आइपुग्छ हस्याङफस्याङ गर्दै र पूरा सामर्थ्य लगाउँछ,
 सामर्थ्य लगाउँछ त्यो अन्धकारको अस्तित्त्व मेटाउन
 रातभर तिम्रै समीप बसी, आफ्नै काखमा सुस्त्याउँछ तिमीलाई
 किनकि थाहा छ उसलाई, गार्हो छ तिमीलाई
 गाह्रो छ यो अन्धकारमा साहरा भेटाउन
 जब रात कट्छ, अन्धकार हट्छ र दिन सुरु हुन्छ
 ऊ बुज्छ, अब उसको खाँचो छैन तिमीलाई
 र लुकिदिन्छ ती बादलका मुस्लाहरूलाई पर्दा बनाई
 तर ऊ चिहाइरहेको छ र सधैँ तत्पर छ
 तत्पर छ अन्धकारसँगै ती बादलका पर्दा हटाउन
 तिमी नझुक्किनु है धर्ती
 तिमीलाई लाग्ला घामको अघि त्यो जूनको के महत्त्व
 नजानौली उसको त्यागको महत्त्व प्रस्ट्याउन
 ऊ चर्किदैन, बस् चम्किन्छ मात्रै
 किनकि उसलाई डर छ र ऊ चाहँदैन
 चाहँदैन तिमीलाई थोरै पनि चोट पुर्याउन
 त्यसैले त ऊ सरल छ, शान्त छ, शीतल छ
 उसको यो मायालाई तिमी स्वार्थको संज्ञा नदिनु है धर्ती
 यो त केबल उसको माया हो, निःस्वार्थ माया l