नारीको सम्मान गरौँ

 चुलो चौको र मझेरीमा लुटपुटिएर
 जीवन फुलाएर सिँगार्दै सधैँ
 तन काटेर मन बाँडेर सन्तानहरुमा
 अभाव र गरिबीको सुस्केरामा 
 भाग काटेर सधैँ छाक टारीरहन्थ्यौ ।
  
 आँसुको सागरबिच मुस्कान छर्दै
 लाखौँ पीडा र बेदनाको गीत गाउँदै
 जीवनरुपी रथलाई हाँक्दै, हाँक्दै
 उकाली ओराली र भन्ज्याङहरूमा
 सत्य र निष्ठाका विगुल बजाउँदै
 सधैं सन्तानको भविष्य र राष्ट्रको 
 संवृद्धि र विकास सोची रहन्थ्यौ ।
  
 तर तिमी झरी बादल र असिना सँगै
 बाढी, पहिरो र भुकम्पसँग जुधिरह्यौ
 आस्थाको धरोहरमा खोट नलगाई
 संस्कार र संस्कृतिको महिमा अनि
 समानता र जातीय मुक्तिको अनेकौँ
 मोर्चामा अनि संघर्षका मैदानमा
 पुरुष सँगै हातेमालो गरिरह्यौ ।
  
 नारी मुक्तिको गीत गाउँदै, हिँड्नुछ अब
 विभेद र अपमानका जन्जिर चुडाल्दै
 मान सम्मानको रक्षाका लागि
 खबरदारीको सङ्खघोष गर्दै
 पुरुष सँगसँगैको मोर्चामा हातेमालो गर्दै
 जुटेर सफल बनाउनुछ नारी दिवश
 ज्ञात अज्ञात सहिदहरूप्रति
 टक्र्याउनुछ श्रदासुमन र समर्पण भावहरू ।
  
 सन्दर्भ – अन्तराष्ट्रिय श्रमिक महिला दिवश ( ८ मार्च )