खोजौं टुकी–समृद्धि

आउनुहोस्
देशवासी मिलौं
हामी सबै मिलेर सुरु गर्नुछ
अब एउटा यात्रा
समृद्धिको
एउटा बेग्लै प्रगतिको
खोजौं मिलेर सबैले अब
खिया लागेका र धुलाले ढाकेका
ती टुकीहरू र
पुछपाछ पारौं
टल्काउनुपर्छ टिलिक्क पारेर तिनलाई
आमाका फाटेका गुन्युँ र
फाटेका सिरकका खोल च्यातेर
लगाउनुपर्छ सलेदो र
बाल्नुपर्छ अब सबैतिर टुकी।
 
अब मिर्मिरे नहुँदै
कलेज पुग्नुपर्ने कसैले
लगाउनु पर्ने छैन बिब्ल्याटो कमिज र सुरुवाल
त्यसैले खोज्नु छ अब
प्राचीनतामा नवीनता
त्यो बिरासत हो हाम्रा पुर्खाहरूको
हामीलाई छोडिदिएको नासो ।

हो, समृद्धिको नयाँ यात्रा सुरु भएको छ
अब बिस्तारै
बिजुलीका स्विचहरूमा खिया लाग्दै जाने छ
अनि हामीले चिमलाई हेरेर
गर्नुपर्छ अनुभव हिजोका उज्यालोको
टेलिभिजनका काला स्क्रिनमा
हिजोका समाचार सम्झिनुपर्छ
सँगै मिठामिठा गीत र नृत्यहरू
आँखामा नचाउनुपर्छ
र मनलाई रञ्जित बनाउनुपर्छ
चार्ज रित्तिएका खाली आइफोनहरू
हत्केलामा च्यापेर लुरुलुरु सडकमा हिँड्नुपर्छ।
दन्त्यकथा बनाउनुपर्छ
तिनको उज्यालोको महिमाको
र सुनाउनुपर्छ हाम्रा सन्ततीहरूलाई
नत्र ती बिस्तारै इतिहासका गर्भमा विलुप्त हुने छन्
हामी पनि बिस्तारै इतिहास बन्ने छौं
एउटा कालो इतिहास।
त्यसैले त अब
हिउँ शिखरहरूमा उक्लिनुछ
यसरी नै
टुकी बालेर समृद्धि खोज्न ।