February 27, 2024, Tuesday
२०८० फाल्गुन १५, मंगलवार

आखिर किन ?

 धेरै दिन भयो, 
हराइरहेको भान हुन्छ कता कता
केही गर्नुछ, बोल्नुछ, लेख्नुछ जस्तो लाग्छ,
तर सक्दिनँ, केही बोल्न,लेख्न र गर्न
खै केले रोक्छ मेरा, आवाज, कलम र हातहरूलाई
अनि दिक्क लागिरहन्छ,असमानताप्रति ।
 
किन शिशु गर्भमै रुन्छिन् ?
किन नामकरणमा सात र एघार दिन ?
प्राकृतिक कुरामा छुवाछुत किन ?
 पराइ घरको आँगन उनैलाई किन ?
 शिक्षाको सागरमै विभेद किन ?
चार दिवारको कार्यबोझ उनैलाई किन ?
 
महान् धर्ती, सुशील, सहनशील भन्दै,
ममता, सृजना, अज्ञानता, र बाध्यताको दुरुपयोग किन ?
मन लाग्छ-
हजुरामा, आमा, म र मेरी छोरीका सपनाहरूमा,
धार्मिक ग्रन्थ, समाज र सोचले कठपुतली बनाएको कथा बाच्न,
 
महिलाको शत्रु महिला भन्न सजिलो कसरी भयो ?
सोचिएको छ र कतै-
महिलालाई महिलाकै विरुद्ध बोल्न केले सिकायो ?
सामाजिक, आर्थिक, लैंगिक र जातीय विभेद निम्त्याएको,
जड खोज्नको सट्टा
सतहमा
विवेक र कर्तव्यको कथित ज्ञान खन्याएर
हामी नै सबथोक भनिरहँदा,
आफ्नै सृष्टिकर्ता जननी, सहयात्री र
आफ्नै अपमान हुन्छ भनेर किन बुझ्दैनौं हामी ?
 
मेरा आवाज, कलम र हातहरू रोक्ने कारण कतै,
त्यही धार्मिक ग्रन्थ, समाज र सोचले कठपुतली बनाएको कथा त होइन ?
 सोच्न विवश बनेकी छु म ।।