केही मुक्तक

एक
धरी घरी किन तिमी मुटु चोर्न आउँछौ
अति भयो अझै तिमी मुटु कोर्न आउँछौ
आरामसँग बस्‍नै दिन्नौ कुनै बेला पनि
किन मेरो अझै तिमी मुटु फोर्न आउँछौ ।

दुई
तिम्रो दिलको बगैँचामा भमरा म बन्न सकूँ
सधैँ सिरमा सिउरिने जमरा म बन्न सकूँ
सम्बन्धको गाँठो कस्न खोजेँ मैले तिमीसितै
तिम्रो तस्बिर खिच्न पनि क्यामरा म बन्न सकूँ ।

तीन
तिम्रो मेरो चिसिएको सम्बन्धलाई तताएर
पोख्छौ अरे मनका कुरा आफन्तलाई बताएर
भन्न किन सक्दिनौ नि मेरा सामु आई तिमी
काहाँ मिल्छ शान्ति तिम्रो हेर मलाई सताएर ।

चार
नेतालाई कानुन कुनै लाग्नुहुन्न भन्छ
सानाले देश छोडी भाग्नुहुन्न भन्छ
जे जे हुन्छ आफ्नो देशमा चुपचाप बस
जनता चाहिँ देशमा जाग्‍नुहुन्न भन्छ ।

पाँच
पातजस्तै झरी गयौ समाएरै बाँचेको छु
मुटुभित्र तिम्रो फोटो सजाएरै बाँचेको छु
रुवाएर गयौ तिमी पखालियो मैलो जति
पलाएको पालुवा हुँ रमाएरै नाचेको छु ।