गजल

फर्किएर परदेशबाट एकचोटि त आउँछस् होला नि
हाम्रा लागि नभए नि अंशलाई त आउँछस् होला नि !

तेरा बाले खाई-नखाई कमाएको यो दौलत-सम्पत्ति
बुढेसकालमा आश्रमसम्म लान त आउँछस् होला नि !

अरूका छोरा सरकारीमा पढाउँदा निजीमा पढायौँ तलाईं
मर्नै बेला भो छोरा सुनपानी खुवाउन त आउँछस् होला नि !

एउटा छोरो हो भनी खुबै पुल्पुलाएर हुर्कायौँ हाम्ले पनि
मरे कि जिउँदै छन् अझै भनी हेर्न त आउँछस् होला नि !

सेता कपाल चाउरिएका गाला बिरूप भएका छौँ हामी
सँगै लान  नभए पनि औँठाछाप लान त आउँछस् होला नि !