May 18, 2024, Saturday
२०८१ जेष्ठ ५, शनिबार

किसान

हेर न आहा ! किसानको लर्को झरेको खेतमा
कोदाली, कुटो हातमा बोकी नेपाली भेषमा
बोकेर डोको गोरुका पछि झरेर ओरालो
कतै छ सिम सम्म छ कतै बाँझो र भिरालो । 

लाले र माले हलका गोरु बाँधेर जुवाले
देखिने प्यारो सुन्दर बेँसी सिमल भुवाले
डाँडामा गाउँ गैरामा खेत दिनदिनै धाएर
हलो र जुवा भुटेको मकै थैलामा लाएर ।

ढाकाको टोपी भेषले झन बढेर इमान
नथाकी कत्ति जोतेर खेत बाँचेका किसान
गाईको मल हालेर खेती हरियो बनाई
अनेक रोग, दम र प्रेसर टाढा नै भगाई ।

गाई र गोरु साथमा सधैँ उनकै सहारा
मकैको भात, कोदाको ढिँडो पोसिलो आहारा
छ्यापेर हिलो रोपेर धान झार नि गोडेर
लगाई पानी हुर्काई धान परिश्रम गरेर ।

सुन झैँँ बाला पँहेलपुर झुलेर पाकेका
पारेर खात कुनिउँमाथि ओतमा राखेका
चटारो सकी खेतको बाली जतन गरेर
फेरि नि आहा ! सुन्दर खेत मकै नि छरेर ।