June 19, 2024, Wednesday
२०८१ असार ६, बुधबार

दायित्व वाङ्मय प्रतिष्ठानद्वारा सम्मान र पुरस्कारको निर्णय

२०८० वैशाख २९, काठमाडौं।

दायित्व वाङ्मय प्रतिष्ठान, नेपालको हालै बसेको कार्यसमितिको बैठकले प्रतिष्ठानद्वारा अर्पण गरिने २०८० सालका विभिन्न सम्मान तथा पुरस्कारका लागि प्रतिभाहरूको चयन गरेको छ। प्रतिष्ठानका अध्यक्ष रामप्रसाद पन्तको अध्यक्षतामा बसेको बैठकले शशी पन्थी (गुल्मी) र रमेश गोर्खाली (काठमाडौं) लाई दायित्व वाङ्मय विशिष्ट सम्मान तथा विष्णुबहादुर सिंह र चन्द्रकान्त आचार्य (अर्घाखाँची) लाई दायित्व वाङ्मय सम्मान अर्पण गर्ने निर्णय गरेको छ।

पुरष्कृत व्यक्तित्वहरू

यसैगरी प्रतिष्ठानले विद्वच्छिरोमणि हेमराज पुरस्कारद्वारा कोशकार चूडामणि गौतम, दायित्व मुरलीदेवी-गुरुदत्त काफ्ले स्मृति पुरस्कारद्वारा वसन्त रिजाल, दायित्व यशोदा पन्त प्रतिभा पुरस्कारद्वारा डा. जया सत्याल र हरिकला-गुणाकर दायित्व रचना पुरस्कार-२०७९ द्वारा त्रिभुवनचन्द्र वाग्लेलाई पुरस्कृत गर्ने निर्णय गरेको छ। सम्मान र पुरस्कारहरू आगामी जेठ १३ गते शनिबार काठमाडौँमा कार्यक्रमको आयोजना गरी समर्पण गरिने प्रतिष्ठानले जनाएको छ।●