July 20, 2024, Saturday
२०८१ श्रावण ६, आईतवार

द्वन्द्व : समय र म

समय म काँटिरहेछु
समय मलाई काँटिरहेछ
समय म साटिरहेछु
समय मलाई साटिरहेछ
उफ् !
समय र मबिच
त्रासद द्वन्द्व चलिरहेछ ।
समयलाई म भित्ताको क्यालेन्डरमा हेरिरहेछु
समय भित्ताबाट मलाई विस्फारित आँखाले हेरिरहेछ
हामी हेराहेर गरिरहेछौँ
समयलाई म मुठीभित्र राख्न चाहन्छु
समय मलाई उसको कठपुतली बनाउन चाहन्छ
जेहोस् !
समय र मबिच
स्खलित द्वन्द्व भइरहेछ ।
समय अघि अधि हिँडिरहेछ
समयलाई म पछि पछि पछ्याइरहेछु
समय हस्याङफस्याङ दौडिरहेछ
समयलाई भेट्न म स्वाँ स्वाँ गर्दै दौडिरहेछु
घुम्तीहरूमा मोडिँदा
समयलाई म –
उसको पुच्छर समाउँछु
अनि,
मबाट समय –
उसको पुच्छर थुत्त खोसाउँछ
म ट्वाँल्ल पर्छु
समय मलाई हेरेर अधिल्तिर कुद्छ
म पनि समयलाई पछ्याउँछु
निसन्देहः !
समय र मबिच
प्रतिस्पर्धात्मक द्वन्द्व भइरहेको छ ।
समय मेरो अघि अघि आगो ओकल्छ
म समयको पछि पछि हिउँ बर्साउँछु
समय तातो आगो मन पराउँछ
म चिसो हिउँ मन पराउँछु
तातो रनक्क रन्किन्छ
चिसो सनक्क सेलिन्छ
अन्ततः !
समय र मबिच
ध्रुवीय द्वन्द्व चलिरहेछ ।
समय –
मैदान मैदान दौडदै पहाडका गर्खाबाट
हिम शिखरतर्फ उग्लिरहेछ
म पनि –
मैदानबाट पहाड हुँदै हिम शिखरतर्फ
सपनाका नौरङ्गी तोरीबारी विचरण गर्दै
उग्लने यत्न गरिरहेछु
समय मभन्दा अगि छ
म समयभन्दा पछि छु
शाश्वत तथ्य यही हो
हामी सँगै छौँ
तर,
समय मेरो अगाडि अगाडि छ
म समयको पछाडि पछाडि छु
अन्तत्वगत्वा !
समय र मबिच
निशस्त्र द्वन्द्व भइरहेछ ।क
समय हिँडिरहेको छ
म पछ्याइरहेको छु
जब,
समय हिम शिखरमा पुग्छ
म पनि शिखरमा पुग्छु
समय त्यही अलपिन्छ
म समयलाई खोज्छु
समय मसँग भाग्छ
समयलाई म देख्दिनँ
समयलाई म खोज्छु
समय मलाई बिर्सिन्छ
समयलाई खोज्दा खोज्दै धाम डाँडामा पुग्छ
बिस्तार बिस्तार सूर्य क्षितिजको काखमा लुक्छ
अँध्यारो पयर फट्कार्दै आउँछ
अफसोस,
चूक घोप्टिएको कालो कालो देखा पर्छ
म काप्छु
म चिच्याउँछु
म विदीर्ण रोदन गर्छु
अनि,
म निः श्वास बन्छु
रै पनि !
समय र मबिच
अस्पृश्य द्वन्द्व चलिरहेछ ।