June 19, 2024, Wednesday
२०८१ असार ६, बुधबार

कहानी कसैको (झ्याउरे भाका)

घर–घरका कहानी यो सबले सुन्नुपर्ने ।
नभनौं भन्छु तर आज भयो भन्नै पर्ने ।।
माया बस्यो उनैसंग तीन वर्षसम्म्म ।
बिहे भयो पञ्चैबाजा बजाएर झम्म ।। १

जग्गे राखी आँगन पोली गोडा धुँदैधुँदै ।
बिदा गरे बाआमाले घुँक्क घुँक्क रुँदै ।।
कन्यादान थापी ल्याएँ सिन्दुर पोते हाली ।
बल्ल आई थाहा पाएँ रैछे दुष्ट जाली ।। २

खाडी गएँ कतार गएँ जागिर नपाएर ।
पैसा सबै पठाएथें आधा पेट खाएर ।।
फुर्मासीले पैसा सकी सुइकुच्चा ठोकी ।
गरगहना धनदौलत भाको सबै बोकी ।। ३

कलेजीको टुक्रालाई घरमा एक्लै छोडी ।
जिन्दगीको सहयात्रा अन्तैतिर मोडी ।।
पढाउने बच्चा भन्दै सहरतिर लागी ।
डेरा छेउ बस्नेसंग पोइल पो भागी ।। ४

जोडिएनन अँधेरीमा तिमी बिना परेली ।
आइरह्यो सम्झना औ तरेली तरेली ।।
पानी पर्यो बलेंसीमा झर्यो झम्म झम्म ।
कुरिरन्छु भन्थी मलाई नआइन्जेलसम्म ।। ५

रात हेर्दा जुनेलीको आकाश निलो–निलो ।
कृष्णपक्ष कालो रात तारा चम्किलो ।।
सुसाएर हुरी बतास चिसो–चिसो हुने ।
निस्ठुरीको याद बोकी कतिञ्जेल रुने ।। ६

बेल पाक्यो कौवालाई न छ हर्ष बिस्मत ।
यस्तै होला आभागी यो पुर्पुरोको किस्मत ।।
रसै खाने भमराले फूलैफूल डुली ।।
हे पापीनी गयौ कता भमरालाई भुली ।। ७

पानी मिठो मूलधाराको घाँटी रसाउने ।
कतिन्जेल त्यो मायाले होला सताउने ।।
घाँटी दुख्यो छाती पोल्यो ज्वरो पनि आयो ।
जाली माया नामको अब रोगले सतायो ।। ८

कस्तो होला रोग यस्तो निकै नहुनी ।
माया भन्ने चिज कस्तो साह्रै बैमानी ।।
काटेको घाऊ जाती होला बरु ओखतीले ।
के होला र निको चित्त, काट्या असतिले ।। ९

रोजी छाडी मनपर्दी गर्दै हिन्नेलाई ।
दुई पैसा दिम्ला बरु मन चिन्नेलाई ।।
दुई दिन एउटासँग चार दिनमा अर्को
कती सँग साट्ने होला पिरतीको बर्को ।। १०