March 29, 2024, Friday
२०८० चैत्र १६, शुक्रबार

ख्वामित ! गल्नुभो कि गाल्नुभो ?

समिरन चालिसे
कक्षा : ७
पाठशाला फाउन्डेसन

 
चर्को घाम छोडेर काम भनेर सलाम मुठी उचाल्दै
दानमाथि मतदान गरेको
जनताले लगाएको छापको पुच्छर समातेर सत्ताको
वैतरणी तर्नुभो ख्वामित ।
 
खाडीको तेल, आश्वासनको भेल चुच्चे रेल गुडाउनुभयो !
हामी जस्ता गरिब जनतालाई सपनाको समृद्धि
पानीकै जहाजमा उडाउनुभयो ।
 
स्वास्थ्य, शिक्षा सबैमा घुस खान छोड्न भएन
आफ्नोबाहेक अरू आफ्नैको पनि मेलो गोड्नुभएन
उखाने शैलीमा बरू पाडोको टाउको काट्नुभो
टाउकोमा अड्केको हाँडी फोड्नुभएन ।
 
समूह गठन भो, बैठक बस्यो, आफ्नैहरूसँग
ख्वामित बस्नुभएन कहिले स्थायी, कहिले अस्थायी
जोगी भेषमा बस्त्र फेर्नुभो तर ख्वामितले खरानी घस्नुभएन ।
 
रिँगटा चल्यो, उल्टी नै भो रे ख्वामितलाई
सिको गर्नुभो, पल्लोघरको स्मार्ट लकडाउन
यस बेमौसमे दिपावली सम्झी बत्ती बाल्नुभो
केही समयलाई सङ्कट टर्यो कि कसो ?
ख्वामित आफू गल्नुभो कि अरूलाई गाल्नुभो ??