June 19, 2024, Wednesday
२०८१ असार ६, बुधबार

मानवता र शान्ति

अन्तरा विष्ट
कक्षा : १०
पाठशाला नेपाल फाउन्डेसन
बागडोल ललितपुर
 
परेवा उड्नुपर्ने शान्तिभूमिको नभमा
गिद्ध सल्बलाएको आभास हुन थालेको छ !
 
कोलाहल छ, छट्पटी छ, अत्यास र उकुसमुकुस छ
प्रकृतिले प्राणवायु उपहार दिएर के गर्नु ?
मूल्य तिरेर पनि एक घुट्को श्वास लिन नपाउँदा
अनाहकमा अमूल्य ज्यान गुमाउन बाध्य हुनुपरेको छ !
परेवा उड्नुपर्ने शान्तिभूमिको नभमा
गिद्ध सल्बलाएको आभास हुन थालेको छ !
 
इन्द्रधनुषी आकाङ्क्षा पूरा हुने पर्खाइमा
अनिश्चितताको कालो बादल मडारिरहेको छ
शान्त र भयरहित रम्नुपर्ने मनहरू
आक्रान्त र भयभीत सन्नाटामा हराएका छन्
परेवा उड्नुपर्ने शान्तिभूमिको नभमा
गिद्ध सल्बलाएको आभास हुन थालेको छ !
 
प्रकृति र मानव बिचको द्वन्द्वमा
प्रविधि र विकासले आगोमा घिउ थपिदिँदा
प्राकतिक प्रकोप र विनाशसँग समृद्धि लजाएको छ
भगवान् बुद्धको जन्मभूमिमा शान्तिले गिज्याएको छ
मानवता छट्पटाएको छ ।
परेवा उड्नुपर्ने शान्तिभूमिको नभमा
गिद्ध सल्बलाएको आभास हुन थालेको छ !