मेरो देश

 एउटा भूगोल 
 हिमालझैं अटल 
 आत्मसम्मानको शिर 
 वीरताको गाथा ओडेर 
 खोज्दै छ अस्मिता आज मेरो देश। 
 सपूतको देन 
 अटल स्वाभिमान 
 दासत्व फालेर 
 खोज्दै छ कोइलामा हिरा आज मेरो देश। 
 तुहिएको गर्भ र कुहिएको बुद्धि 
 देखाई नाङ्गो आँङ 
 खोज्दै छ फरिया आज मेरो देश। 
 बुद्धभूमिको पठार 
 रक्तबीजको नाङ्गो नाच 
 भएर वाक्क देवता 
 खोज्दै छ चण्डी र काली आज मेरो देश।  

 देखेर भष्मासुर 
 भयभीत शिवजी 
 गरेर पश्चातप 
 खोज्दै छ सुन्दरी आज मेरो देश। 
 जुवाको खाल 
 परेर फन्दा शकुनि पासो 
 हारेर इन्द्रप्रस्थ 
 खोज्दै छ हस्तिनापुर आज मेरो देश। 
 कस्तूरी पसिना 
 उर्वर माटो 
 हराएर स्वर्ग 
 खोज्दै छ रछ्यानमा अत्तर आज मेरो देश।