February 26, 2024, Monday
२०८० फाल्गुन १४, सोमबार

चार मुक्तक

तिम्रो खुसी मान्नैपर्छ भन्ने कहाँ छ र ?
सधैँ साथ हुनैपर्छ भन्ने कहाँ छ र ?
दुईचार दिन टाढिँदैमा किन आँसु झार्नु ?
सधैँभरि मिलन हुन्छ भन्ने कहाँ छ र ?
०००     ०००     ०००     ०००
म यात्री हुँ रोक्ने कोसिस नगर्नू
टाढा पुग्नुछ रोक्ने कोसिस नगर्नू
निर्वाध यात्रा गर्न देऊ आज मलाई
म नदी हुँ छेक्ने कोसिस नगर्नू ।
०००     ०००     ०००     ०००
सबैलाई देखाइदिन्छु कविता लेखेर
सबैलाई सुनाइदिन्छु कविता लेखेर
पाऊँ म मौका मात्र कलम छ हातैमा
म देश चिनाइदिन्छु कविता लेखेर ।
०००     ०००     ०००     ०००
राति राति बर्बराउने म त रोगी भइसकेछु
थाहै नपाई मायाको म त भोगी भइसकेछु
भोक बिर्सेँ, प्यास बिर्सेँ, बिर्सेँ रात निद्रा
अहो ! पिरतीकै कारणले म त जोगी भइसकेछु ।