February 26, 2024, Monday
२०८० फाल्गुन १४, सोमबार

जहाँ

जहाँ  नजरको हुन्छ मेल, आफू त्यो गाउँको केटो 
जहाँ  नजरले छुन्छ मुहार, आफू त्यो ठाउँको ठिटो
डुब्न दिऊँ म मनलाई मेरो, झिलझैँ आखाँमा हजुरको 
हजुरकै आखाँले सौन्दर्य के हो ? नशा के हो ? बुझाएको ।
 
भौँतारिन्छन् सब जगतमा, छ सौन्दर्य केमा ? आफ्नै आखाँमा 
पिउँछन् सब नशामा डुब्छन्, छ नशा केमा ? मनको प्रेममा 
खोज्छन् सब ऐनामा, अतीत या भविष्यमा, म को हुँ ? आफ्नै चेतना 
जीवन हो के ? वर्तमानको प्रबेग हो, यात्रा यो अनन्तको पथमा ।
 
मन आफूसित एक, अनेकौँ कुरामा कसरी लागोस् 
मुटु आफूसित एक, अनेकौँ नाउँमा कसरी धड्कोस् ।
 
न अर्को नशामा डुब्नु छ, हजुरलाई आत्मामा लेख्नु छ 
फरक बाटो हिँडे नि अहिले, सँगै अनन्तको बाटो हिँड्नु छ
उडी छुन चन्द्र एक दिन  लक्ष्य सम्झिरहनु छ, मनमा 
हातमा हात समाई, साथ पाई, बाँच्न मन छ, हजुरकै प्रेममा ।
 
कुरा छन् अनेकौँ, खोज्नलाई, खोज्दै म अनन्त, हजुरमा 
रोजेँ हजुरलाई मैले, रोज्नु नै माया हो भने, मेरी माया   ।