मेरी आमा

 सिकायौ तिम्ले गर्न मलाई राम्रा राम्रा काम
 तिम्ले गर्दा पाएकी छु आज मैले नाम
 भन्छ्यौ मलाई सधैँभरि 'गर नानी मान'
 ठुली भई राख्ने छु म पक्कै तिम्रो नाम ।
  
 बढ्दै गएँ हात तिम्रो समाएर डुली
 थाहा पाइनँ कैले भएँ म त यति ठुली
 भन्छ्यौ मलाई 'सधैँभरि हुनुपर्छ ज्ञानी'
 देख्छ्यौ आमा तिमी मलाई सधैँ सानी नानी ।
  
 फकाउँदै बोलाउँछ्यौ '‘आऊ सानी ज्ञानी'
 मलाई ठान्छ्यौ क्यार आमा आँखाको नै नानी
 तिम्ले गर्दा पाएकी छु यति धेरै माया
 किन यति माया गर्छ्यौ मलाई प्यारी आमा !
  
 कैले जिती पुग्छु माथि, कैले हारी मुनि
 जिते पनि हारे पनि सधैँ खुसी छु नि
 तिम्ले पाउ टेक्ने मौका दियौ नि धर्तीमा
 सधैँ भलो मात्र हुन्छ आमाका अर्तीमा ।