June 19, 2024, Wednesday
२०८१ असार ६, बुधबार

तिमी

 यताउता जतासुकै छाँया बनी हिँड्ने मान्छे 
भित्री मनको कुना कुना माया बनी हिँड्ने मान्छे ।
बाहिरी माया नदेखाई भित्री माया गर्ने मान्छे
जस्तै कठिन भए पनि हल्का फुल्का लिने मान्छे ।।
 
कठोरजस्तै लाग्छौ तिमी हिजोआज किन किन
मलम बनी आउँछु है त हावासरि तिम्लाई लिन ।
हेर्दा कठोर देखिए नि मुलायम नै रैछौ तिमी
तिमीभित्र म भएसि कति सुन्दर जिन्दगानी ।।
 
आँखाभित्र राखे पनि नबिजाउने मान्छे तिमी
छातीभित्र राखे पनि लुकिदिने मान्छे तिमी ।
मेरो समीप आउन छाडी किन टाढा भयौ तिमी
मनभित्र लुकी लुकी किन टाढा गयौ तिमी ।।
 
सपनीमा मात्रै तिमी दिनैजस्तो आउने मान्छे
बिपनीमा जस्तै सुन्दर मुटुभरि बस्ने मान्छे ।
गला लाउन खोजिरहन्छु तर तिमी भाग्ने मान्छे
 जति टाढा भए पनि तिमी मात्र मेरो मान्छे ।।