हात्ती (बाल गीत)

हात्ती आयो हात्ती यता आऊ न साथी
नडराई माउते दाइ बसे हात्तीमाथि  ।

जिउ छ बडेमाको खुट्टा खम्बाजस्ता
पृथ्वीमा जनावर हेर कस्ता कस्ता  ।
 
आँखा भने चिम्सा कान नाङलाजत्रा
सुँड सर्पजस्ता दाँत झन् कत्रा कत्रा  ।
 
सर्कसमा उसको कला कत्ती राम्रो
पानी मन पराउँछ हेर हात्ती हाम्रो  ।

दाँतचाहिँ बाहिर छ केले चपाउँछ
क्वाँर्र-क्वाँर्र कराई वनै थर्काउँछ  ।
 
हिंड्छ लमक लमक इसारा यो बुझी
हामीलाई बोक्दा दुखी छ कि खुसी ?