February 27, 2024, Tuesday
२०८० फाल्गुन १५, मंगलवार

प्रेम गीत

शौरव शर्मा

गाऊ न गीत, सजाऊ धर्ती, आकाश रङ्गाऊ
मनमा मेरो,  अप्सरा नाच्दी, कविता म गाऊँ ।
जाऊ न  जाऊ, ल्याऊ न कालो, गाजल ए  ल्याऊ   
निधार छेउ, लगाऊ  टीका, आँखा त नलाऊ ।
 
चरण  पर्‍यो प्रेमको आज दिलका माझमा
पर्देशी आयो बासका लागि घरमा साँझमा ।
धड्कन मेरो बढेको हो कि देखेर त्यो मन
बाटुलो टीका, गाजल उस्तै खुलेको वदन ।
 
मनको प्रेम, झल्कियो आज, कसैका आँखामा
प्रेमको गीत सुन न साथी झ्याउरे भाकामा ।
प्रेमको बीउ मनमा बोकी बोलेमा कविता
बग्छ कि साथी जसरी बग्छिन् सलल सरिता ।।
 
भुरुरु उड्ने यादमा सधैँ मन भो  पुतली 
एकान्त वन मधुर बोली गाउने कोइली । 
पौडिन खोज्छ यो मन सधैँ कसैको यादमा 
टोलाई हेर्छ चन्द्रमा मलाई दिनहुँ साँझमा ।।