हारे उत्पात हुन्छ

मैले राजा फालेको हुँ आफैँ राजा हुन
विपक्षीले लाउनुपर्छ सधैँभरि गुन
नत्र भने बिजोक हुन्छ मेरा सन्ततिको
मलाई कुनै चासो छैन राष्ट्रउन्नतिको ।

नाइकेले भन्या मानी भटाभट दिनू
निष्ठा सारा बिर्सिएर थुरुथुरु हुनू
अटेर गरी अन्त दिए आउँछ विपत् ठुलो
रिस उठे सल्काइदिन्छु देशैभरि झुलो ।

मैले भन्या मान्यौ भने उत्साहित हुन्छु
टालाटुली बटुलेर बुख्याँचालाई चुन्छु
टिकाउँछु बिस वर्ष तिम्रा नाइकेलाई
नत्र भने यसपालि गरिदिन्छु बाई बाई ।

पोहोर साल तोरी कोदो मिसाएर पेल्दा
न त तेल थोपो आयो न भो रोटी बेल्दा
आखिरमा बर्बाद भयो सकिएन खान
मैले हारे उत्पात हुन्छ यति कुरा जान ।