April 13, 2024, Saturday
२०८१ बैशाख १, शनिबार

आखिर कैलेसम्म ?

कैलेसम्म ?
आखिर कैलेसम्म ?
लुछेर एक चोक्टा मासु
चिथोरेर कोमल छाला
गाडेर पुरुषत्वको नङ्ग्रा
देखाएर समाजको यो हैकम
कैलेसम्म नङ्ग्याउँछस् ओ मान्छे !
आफैँले आफैँलाई
आखिर कैलेसम्म ?
 
दाइजोका नाममा कुटिने हामी
उखुबारीका डिलमा लुटिने हामी
घाँस, दाउरा, मेलापातमा जोतिने हामी
चुलोचौको, पानी, पँधेरीमा  जोतिने हामी
भनिदे ओ कालो सत्ता
! आखिर कहिलेसम्म ?
यसरी बारम्बार तेरो दासी बनिरहेने हामी ?
 
महिमावारीमा गोठको पर छाउपडीमा बास
पेटभित्र सधैँ छोराकै आश
एसिडको जलनमा नारी
बोक्सी होस् या वेश्या देख्छस् हाम्रै जिम्मेवारी
विभेद नदेख्‍ने तेरो अन्धो कानुन
सानी बालिकाको मन पर्ने तँलाई नै खुन
आखिर कैलेसम्म गर्छस् चुपचाप चुपचाप दमन ए पुरुष !